සුහුරු පාසල් ව්‍යාපෘතිය නිසා සා.පෙල ප්‍රතිඵල වල වෙනසක්

සුබ නව වසරක් වේවා!!! ඇත්තටම නව වසරේ අඩක් ගෙවිලා ගියත් මගේ blog එක කියවන සුහුරු පාසල් පාඨකයන්ට පළමු වරට 2019 දී පල කරන ලිපිය නිසා මම එහෙම සුබ පතන්නේ.

ඇත්තටම කාලෙකට පස්සේ මට ඔබත් එක්ක බොහෝම සතුටින් බෙදා ගත හැකි ප්‍රවෘත්තියක් තියෙනවා. 2018 වසරේ දී අපේ පාසලේ අ.පො.ස. සාමාන්‍ය පෙල ප්‍රතිඵල අතරින් 2017 වසරට සාපේක්ෂව බොහෝ ඉදිරියට ඇවිත් තියෙනවා කියලා කියන්නේ අප්‍රමාණ ප්‍රීතියකින්. අපි සුහුරු පාසල් ව්‍යාපෘතියට ඇතුළත් වුණාට පස්සේ නව අත්හදා බැලීම් එක්ක හැමදෙයක් ම උපරිම මහන්සියෙන් සිදුකලා. 

ඒ නිසා ම මගේ පාසල අයත් කැලණිය අධ්‍යාපන කලාපයේ 7 වන ස්ථානය දක්වා ඉදිරියට එන්න අපිට හැකිවුණා. ඊට පෙර වසරේ ප්‍රතිඵල අතරින් අප සිටියේ කලාපයෙන් 14 වන ස්ථානයේ. මෙසේ ස්ථාන 7කින් ඉදිරියට එන්නට මේ ව්‍යාපෘතිය අපිට බෙහෙවින් ම ඉවහල් වුණා. එසේම අපි පලවෙනි වතාවට ප්‍රතිඵල විශ්ලේෂණයත් පරිගණකය ඇසුරින් සිද්ධකලා. නමුත් අපි අත්යුරු (Manual) ක්‍රමයත් භාවිතා කලා මෙය තහවුරු කරගන්නට. ඒ අනුවත් අපේ ප්‍රතිඵල විශ්ලේෂණය නිවැරදි බව තහවුරු වුණා.

ඒ අනුව මෙවර අප පාසලේ සාමාන්‍ය පෙල ප්‍රතිඵල අතරින් සමත් ප්‍රතිශතය (මව්බස අනුව විෂයන් 6 ක් සම්මාන 3ක් සහිතව සමත්) 85.12% ක් ලෙස භාෂා මාධ්‍ය තුනෙන්ම කලාපයේ 7 වන ස්ථානය ලබාගත්තා. අනික වත්තල කොට්ඨාශය අතරින් ද ප්‍රථම ස්ථානය ද අප පාසල ලබාගත්තා.

මේ නිසා මම ඔබට කියන්නේ, Think Out of the Box. සැමවිටම සම්ප්‍රදායක ක්‍රමයෙන් බැහැරව හිතන්න. කාලයෙන් කාලයට ඉගෙනුම් ඉගැන්වීම් ක්‍රියාවලිය වෙනස් වෙන කොට අපිත් වෙනස් වෙන්න ඕන. ඒ ක්‍රමයට ගියොත් අනිවාර්යයෙන්ම සාර්ථක ප්‍රතිඵල ලබන්න පුළුවන් වෙයි. මගේ බලාපොරොත්තුව මේ ආකාරයටම උසස් පෙල ප්‍රතිඵලත් මීට වඩා දියුණු කරන්න. එයත් සාර්ථක වෙයි කියලා මම හිතනවා.